Polisielid gewond tydens skietgeveg met gewapende mans

‘n Polisiebeampte is gewond tydens ‘n skietgeveg met gewapende mans gister op die R570 Jeppes Reef-pad buite Malalane. Volgens die polisie het lede tydens ‘n patrollie vier swaar gewapende mans in ‘n enkelkajuitbakkie opgemerk. Hulle het hulle genader en die skietery het uitgebreek. Die beampte is in die bolyf getref. Die verdagtes het mettertyd gevlug. Volgens inligting het hulle hul voertuig in Matsulu agtergelaat en ‘n silwergrys BMW gekaap – wat ook later agtergelaat gevind is. Die polisiewoordvoerder, brigadier Selvy Mohlala, sê hulle het ‘n sekere rooftog afgeweer. ‘n Saak van poging tot moord word ondersoek. Geen arrestasies is nog gemaak nie.