Twee gearresteer vir moord op onderwyseres

Twee mans het gister in die Kwamhlanga-hof verskyn op aanklagte van moord, poging tot moord, ontvoering en huisroof na hulle glo ‘n reeks huisrowe uitgevoer het. ‘n Onderwyseres is verlede Maandagaand in Phola Park vermoor en twee ander mense is beroof. Volgens die polisiewoordvoerder in Mpumalanga, Kolonel Donald Mdhluli, het Rose Mahlangu mense betrap wat besig was om haar huis te plunder. Sy is in haar motor gedwing en haar lewelose liggaam is die volgende oggend gevind. Solly Ndala en Vusi Ngozo kan op 30 Oktober aansoek doen vir borg. ‘n Derde verdagte word gesoek.