Klasse hervat sonder onderbrekings op NWU se Mafikeng-kampus

Die Noordwes-Universiteit se Mafikeng-kampus se normale akademiese program het gister sonder enige onderbrekings of voorvalle van betogings hervat. Die kampus het gister heropen nadat dit vir bykans 'n maand gesluit was wees gewelddadige betogings. Kampuswoordvoerder, Phenyo Mokgothu, sê klasse, het na 08:00 soos geskeduleer begin en die laaste klasse het teen 17:00 geëindig. Klasbywoning was goed. Mokgothu sê bykomende klasse oor naweke begin Saterdag om agterstallige werk in te haal. Volgens Mokgothu sal daar nie ‘n toetsreeks wees nie, maar toetse sal in klastyd geskryf word.

Mokgothu sê ‘n sekuriteitsmaatskappy se dienste word steeds gebruik. Hulle is egter nie op kampus nie, maar op bystand sou geweld uitbreek.