#JouMenseMyMense

GROOTFM 90.5  |  Podcast , ±7 min episodes every 1 week, 1 day  | 
Die omvang van die nood laat mens soms oorweldig, verlam en selfs effens lomp voel. Net omdat ons nie alles vir almal kan wees en doen nie, beteken nie ons moet ons gewone menslike omgee verloor wat fokus op dit wat ons wel vir mekaar kan doen nie.

GROOTfm 90.5 en SPAR sê “Jou mense is my mense”!

Kuier elke Dinsdagoggend om 10:10 saam en hoor of Lindie Strydom ‘n ouma met ‘n cupcake verras, ‘n dogtertjie in die hospitaal besoek of vir die karwagte ‘n sakkie kruideniersware neem.

GROOTfm 90.5 se #JouMenseMyMense en sáám is ons beter, word met trots geborg deur SPAR.

Subscribe to this channel

You can subscribe to new audio episodes published on this channel. You can follow updates using the channel's RSS feed, or via other audio platforms you may already be using.

RSS Feed

You can use any RSS feed reader to follow updates, even your browser. We recommend using an application dedicated to listening podcasts for the best experience. iOS users can look at Overcast or Castro. Pocket Casts is also very popular and has both iOS and Android versions. Add the above link to the application to follow this podcast channel.

Apple Podcasts

This channel is available on iTunes. Follow the above link to subscribe to it in your iTunes application or the Apple Podcast application.

Signup to iono.fm

Sign up for a free iono.fm user account to start building your playlist of podcast channels. You'll be able to build a personalised RSS feed you can follow or listen with our web player.
12
AUG

#JouMenseMyMense saam met SPAR – Marco se Koeksisters - 11 Augustus 2020

Marco Swanepoel het vir 10 jaar lank as voorman in konstruksie gewerk voor hy 3 jaar gelede afgelê is. Hulle het alles verloor en moes van vooraf begin... Hy het hierdie jaar op ‘n tydelike basis vir sy sussie begin werk, maar nou trek haar besigheid swaar as gevolg van die inperking en boonop werk Marco se vrou, Cindy by ‘n kleuterskool en kry ook net ‘n UIF bydrae in hierdie stadium.
En so besluit Marco, Cindy en al drie hulle kinders – Marcelle (8), Sasha-Lee (10) en Caitlin (12) om koeksisters te begin bak vir ‘n inkomste – einste sy dogtertjies wat hom die deeg leer vleg het, want hulle gesin se motto is: “Ons doen alles saam!”
Ongeveer 300 dosyn koeksisters en ook 4 geure beskuit later, droom Marco nou van sy eie tuisnywerheid en ‘n besigheid wat hy vir sy gesin kan opbou, want soos hy sy eie sterkpunt beskryf: “Ek gee nie sommer op nie.”
05
AUG

#JouMenseMyMense saam met SPAR – Gesin in karavaan en tent - 4 Augustus 2020

Op die erf waar hierdie gesin bly, is daar vyf karavane, ‘n wendyhuis en een bad en stort wat almal moet deel. Die karavaan is stukkend, dit reën in en muf. Alg en iets wat soos boomwortels lyk groei teen die badkamer en stort se muur.

Madelyn het voorheen as barlady gewerk, maar toe verloor sy haar werk as gevolg van haar gesondheid. Die gesin het alles verloor. Hulle bly die afgelope jaar in hierdie karavaan met die stuk tent aan. Net voor lockdown het sy weer ‘n werk as barlady gekry, maar met die inperking het sy weer haar werk verloor en so het hulle agter geraak met die karavaan se huur wat R100 per dag is. Haar verloofde, Danie is ‘n karwag. Hy kon eers in die middel van vlak 4 weer begin werk, maar net 3 dae per week en teen tussen R50 en R100 per dag. Hulle sukkel om te oorleef, slaap sleg op die karavaan matras en veral die dogtertjie (11) kla gedurig dat sy seer het.

Die desperate e-pos sê: “Ek huil letterlik elke dag en bid vir beter plek om in te bly wat skoon, netjies, veilig en higiënies is, met water om skoon te maak en hande te was. Ons is arm, maar ons wil net ordentlik leef. Kan julle ons asseblief help?”
29
JUL

#JouMenseMyMense saam met SPAR – Die Rust gesin se kosaflewerings - 29 Julie 2020

In ‘n woonstelletjie wat hulle huur by die kerk bly die Rust gesin – Pa Johan (52), Ma Yolande, 18-jarige Franco en kleinsus Bianca.

Johan het ‘n paar jaar gelede sy werk verloor en na 2 jaar se CV’s uitstuur en vir onderhoude gaan net om elke keer te hoor hy is te oud, het hy begin om kosaflewerings te doen. Die verskil is net dat hierdie gesin van 4 die aflewerings saam doen, sodra ma Yolande by die huis kom, want sy is Johan se oë. Johan is ‘n diabeet en sukkel met katarakke, maar ‘n trotse pa wat sy kinders wil leer van harde werk. Saam-saam het hulle al geleer om die uitdagings van die lewe met ‘n tikkie humor te hanteer, ook die vreemde kyke van mense as hulle stop om die kos af te laai of om net eenvoudig op te staan en weer te probeer as die “hacker” op ‘n slinkse manier jou hele week se hardverdiende geld gesteel het. Maar dis ‘n gesin wat ook vertrou vir ‘n deurbraak en hoop vir ‘n betroubare kar en dalk ‘n geleentheid vir Franco om ‘n ambag te leer.

Danksy SPAR kon ons hierdie gesin seen met ‘n geskenkkaart en ‘n R2500 bydrae vir die kar se herstel, maar vir almal van ons wat sommer so vinnig op die foon ‘n ete bestel - weet dat jou R50 of R100 tip vir ‘n gesin soos hierdie soos manna uit die hemel is en maak dat hulle vandag weer kan sê: “Ons is nie sukkelaars nie. Ons survive. Ons is geseënd.”
22
JUL

#JouMenseMyMense saam met SPAR – Brand in Plastic View - 22 Julie 2020

Met tot 11 mense wat saambly in ‘n huisie van plastiek en karton, kan mens verstaan hoe ‘n kers per ongeluk omval en 79 shacks binne oomblikke tot op die grond afbrand om meer as 400 bitter behoeftige mense sonder ‘n heenkome of enige beskutting teen die winterkoue te laat.

Dis presies wat Saterdagoggend vroeg in die informele nedersetting in Pretoria-Oos, Plastic View, gebeur het. Soos Sanet Fagan van SA Cares for Life sê dit bly ‘n wonderwerk dat niemand dood is nie, maar dis ‘n hartseer prentjie van verslae mense wat absoluut alles verloor het en op die as bly sit om net nie hulle staanplek te verloor nie…
15
JUL

JouMenseMyMense - Woensdag 15 Julie, Donderdag 16 Julie 2020

Anneline (20) dink nie dis enige hulp of aandag werd wanneer jy doodeenvoudig baie hard werk om jou droom waar te maak nie, maar ons sien ‘n besonderse gesindheid van iemand wat nie dink die wêreld skuld haar iets nie, maar werk vir dit wat sy vir die wêreld kan bied! Met elke terugslag, ook wanneer die impak van die inperking haar haar werk kos, laat sy niks haar onderkry nie, want sy glo “only you can make the difference.”
02
JUL

Jungle beat onderhoud

GROOTfm 90.5 — Enige ander lekker GROOT onderhoude oor spesiale geleenthede wat buite ons normale program-formaat val.
01
JUL

JouMenseMyMense saam met SPAR – Juan Nel, 1 Julie 2020

Juan Nel het voorheen as ‘n kelner by ‘n restaurant gewerk wat intussen as gevolg van die impak van lockdown hulle deure moes sluit. Al die personeel het hulle werk verloor. Juan het besef hy gaan ‘n plan moet maak en het begin vetkoeke bak. Sy ouma, wat self koekies en beskuit bak om haar inkomste aan te vul, het vir Juan ‘n braaipan gegee en sy eerste bestanddele gekoop en binne 2 weke het hy genoeg geld verdien om ‘n gedeelte van hulle huur te betaal en om ‘n tweedehandse vrieskassie te koop.

Ons het by Juan en sy seuntjie Le Roux gaan kuier waar hulle woon - ‘n enkel garage wat in n tuinwoonstelletjie omskep is en in die hoek – ‘n blad met die braaipan waar daar vetkoeke gebak word met ‘n motto van: “Begin klein, eindig groot.”

‘n Ma en dogter het laas week by GROOTfm ingestap met ‘n skenking van kruideniersware wat ons vir hierdie gesin kon gee saam met ‘n geskenkkaart van SPAR as ‘n belegging in Juan se besigheid. Ma Amanda se briefie het gesê: “Ek is maar net ‘n ma wat so graag my seun wil help om sy droom van ‘n vetkoek-besigheid waar te maak.” ‘n Droom wat dalk klein begin het, maar met jou hulp groot kan eindig...
23
JUN

JouMenseMyMense saam met SPAR – LS Westerlig, 24 Junie 2020

Laerskool Westerlig is in die hartjie van Danville met ‘n gevestigde voedingskema wat na 150 behoeftige gesinne omsien. Terwyl ons in die kombuis by Santie, Alice en Amanda kuier, vertel die skoolhoof, Mnr. Erich Cloete dat hy daar was toe die kaste in 1997 ingebou is, wat beteken die “tender loving care” van hierdie omgee-kombuis dien al 23 jaar lank die kinders van Westerlig. Ons het by die skool gaan inloer om te hoor wat die impak van die inperking op hierdie span se liefdestaak is.
23
JUN

JouMenseMyMense saam met SPAR – Paramedikus, Ruan Heyns, 24 Junie 2020

Ruan Heyns is ‘n ILS paramedikus wat nog regdeur die pandemie sy tyd en reddingsdienste gratis lewer aan die gemeenskappe van onder andere Centurion, Pretoria-Oos, Diepsloot, Mamelodi en Erasmia. Hy betaal self sy voertuig, die diesel, en toerusting - sonder enige vergoeding - terwyl hy elke dag jaag na huisbrande, skietvoorvalle, rooftogte, aanrandings en motorongelukke wat sy eie lewe in gevaar plaas, maar vir die liefde en passie vir die saak

Hannes Bosman, wat self in die nooddienste is en vir Ruan in 2001 ontmoet het waar hulle saam by ‘n hospitaal gewerk het, het vir ons ‘n e-pos gestuur op ‘n dag wat Ruan weer uit was om te help met net R800 in sy sak oor en op sy laaste tenk diesel. Hannes sê: “Ruan is baie hardwerkend, lojaal en ‘n absoute perfeksionis – hy hou daarvan om ‘n ding reg te doen. Hy het ‘n baie klein hartjie, met soveel liefde en omgee vir sy medemens. Kla nooit, altyd vriendelik, liefdevol, sag met pasiënte. Gee en gee en gee sonder om terug te verwag. Hy is ‘n ware voorbeeld van naaste liefde inteendeel, ek het vir my kinder gesê dis hoe mens gee. Soos oom Ruan gee,” vertel Hannes.

Die getuienis van Ruan se lewe is genoeg bewys dat hy dit nie vir erkenning doen nie, maar hierdie vriend en mede-dienswerker van hom wou ‘n dankie hardop sê waar almal dit kan hoor. En daarmee wou ons span van GROOTfm90.5 help – maar ook op ‘n praktiese manier met ‘n R2000 bydrae – al is dit dan vir ‘n volgende tenk diesel - en ook ‘n SPAR geskenkkaart as ‘n dankie van ons JouMenseMyMense projek.
17
JUN

JouMenseMyMense saam met SPAR – LIG Kinderbediening, 17 Junie 2020

LIG Kinderbediening is ‘n interkerklike nie-winsgewende organisaise wat in 2008 ontstaan het toe hulle bewus geraak het van die geestelike nood onder veral die Afrikaansprekende gemeenskap van Pretoria-Wes. Tydens die aanbieding van hulle Bybelklub wat spoedig tot 9 klubs gegroei het en ook by die kampe wat deur honderde kinders bygewoon is, het hulle mettertyd besef hoeveel van hulle kinders ook meer as net geestelike insette nodig het.

Ontwikkelingsagterstande as gevolg van hierdie kinders se moeilike omstandighede het die span genoodsaak om wyer te kyk en ook betrokke te raak by kinders se emosionele gesondheid en welstand. Dit het ‘n groot invloed op hulle skoolprestasies en of hulle uiteindelik hulle volle God-gegewe potensiaal sal kan bereik.

Daar is baie gebid en beplan en weer gebid en in 2017 danksy ‘n donateur, het die LIG Terapiesentrum tot stand gekom met onder andere opvoedkundige en terapeutiese programme, ouerleiding vir die mammas, ‘n kuierklub vir tieners en baie ander aktiwiteite. Dis einste hier by die Terapiehuis in Danvillie waar Lindie Strydom met die uitvoerende hoof van LIG Kinderbediening, Louise Rossouw gesels het oor hoe die kinders, maar ook die gesinne waarvan hulle deel is en waarby hulle betrokke is se behoeftes verander het in hierdie tyd.

146 episodes

« Back 1—12 More »